التمثال السحري 😲🤔
التمثال ده موجود في المتحف المصري بالتحرير، اغلب زوار المتحف بيخافوا منه والمرشدين مش بيشرحوه إلا في السريع ..ليه بقى؟!
التمثال مصنوع من البازلت الاسود وبيرجع تاريخه للعصر البطلمي وعثر عليه في تل أتريب بالقليوبية، وهو خاص بكاهن اسمه جد حور ومعنى اسمه المنقذ، الكاهن جد حور اشتهر جدا في زمنه بإن له القدرة على شفاء أي مرض مهما كان مستعضي لدرجة إنه تحول لأسطورة، زي الأولياء وأصحاب المقامات دلوقتي.
التمثال منقوش بتعاويذ سحرية خاصة بالشفاء من جميع أنواع الأمراض وطرد جميع الشرور، والنقوش مغطية كل جزء من التمثال والقاعدة وحتى الضهر.
وكان بيتم صب مياه على رأس التمثال وتمشي على التعاويذ المنقوشة لحد ما تتجمع في حوض قدام التمثال لحد ما تتحول المياة لمياة مسحورة يشرب منها المريض أو الممسوس أو يغتسل بيها لحمايته، وترديد التعاويذ دي واللي كانت بتوصل لدرجة الخلاص والقتل من أجل الحماية.
التمثال بيمثل الكاهن على شكل كتلة وقدامه الرب حورس الطفل ماسك غزالة وأسد رمز الوداعة والقوة وهما قوى الطبيعة المختلفة، واللي لو حصل اي اختلال فيها بيحصل المرض وبالتالي التوازن بينهم بيعمل توازن للانسان. وتحت حورس الطفل تمساحين عكس بعض دلالة على قوى الشر الخفية، لإن التمساح بيكون مستخبي في النهر علشان يهجم على فريسته زي المرض.
ورغم إن علماء كتير اعتبروا إن دي مجرد نقوش دعائية لتخويف الأعداء مش أكتر، إلا إن عاطف أبو الدهب احد مسئولي المجلس الأعلى للآثار (وزارة الآثار حالياً) كان مؤمن جدا بالطاقة اللي بيصدرها التمثال وقدرته السحرية على الحماية والخلاص من الأعداء وقوة تعاويذه لدرجة إنه كان بيحذر من أي محاولة ترميم أو احتكاك بالتمثال، وأشار لمحاولة احد الخبراء البولنديين في ترجمة وتفسير النقوش السحرية بالآثار المصرية كاملة لكنه مات بعدها مباشرة.
زوروا المتحف المصري واتفرجوا على التمثال، وقولولنا احساسكوا ايه!
#أشهر_خرافات_الفراعنة
إرسال تعليق