سلامات لـ لبنان وأهلها الغاليين

لبنان الدولة الاكثر بؤسا في العالم

تضخم فوق 100%

عملة كل يوم بسعر والسوق السوداء اعلي من الرسمية ب 3 اضعاف

سلع غير متوفرة لان مفيش دولار لان كله مستورد

كهربا بتتقطع 18 الي 20 ساعة من ال 24

اتصالات ضعيفة لان مفيش كهربا

عجز موازنة وعجز حساب جاري فوق تحمل أي اقتصاد

ميليشيات مسلحة بتتحكم في قرار الدولة 

احزاب منقسمة ومفتتة الشعب ما بينهم

حكومة ليس لها اي سيادة او هيبة او قرار

سندات رفضت سدادها واعلنت افلاسها 

ومفيش دولة او مؤسسة تمويل قادرة تساعد اللبنانيين لانهم مش عارفين يساعدوا نفسهم

واتضربت بكورونا في نظام صحي ضعيف اصلا جوة اقتصاد بينهار ودولة مفتتة

وفوق كل دة انفجار ضخم غير طبيعي وبشع بيعطل كل الشغل في المينا الاكبر والاهم اللي بيستقبل السفن القليلة والنادر وصولها اصلا اللي بتحمل كميات بسيطة من السلع الاساسية تضمن ان الناس متموتش من الجوع وتعيش ع الكفاف

لو أنت لسه مش عارف أيه اللي بيحصل في لبنان حاليًا، خليني أقولك إن جزء من العاصمة بيروت اتدمر تمامًا تحت تأثير إنفجار هائل يحمل شكل شبيه بسحابة عيش الغراب الشهيرة للإنفجارات النووية.. وسواء كان الإنفجار ده بفعل فاعل، أو انفجار عادي بفعل خطأ، ف هو لسه محدش يعرف الحقيقة كاملة فين..

خليني أحكيلك الموضوع بالتفصيل، بس مبدئيًا وقبل أي حاجة، أنا قلبي واجعني جدًا من اللي هكتبه ده، بس هنقلكم الخبر بأكبر قدر ممكن من المعلومات اللي تخصه..

شوف الصور اللي مع البوست 👇

اللي حصل بالظبط هو إن اليوم بدأ يوم طبيعي زي أي يوم.. الناس ماشية عادي ف شوارع بيروت، بيفكروا ف أحوال بلدهم المتردية، اللي على شفا الإنهيار الإقتصادي بسبب الأزمة الاقتصادية اللي بتمر بيها بقالها فترة، وكمان وسط الاشتباكات الدائرة بين تنظيم حزب الله اللي هو جزء من الحكومة اللبنانية، وما بين الجيش الإسرائيلي بقالها أسبوع..

وفجأة وبدون سابق إنذار، سمعوا صوت انفجار كبير، بس مش أوي.. ف الناس قلبها وقع ف رجليها وافتكروا ان ده قصف إسرائيلي ولا حاجة.. وكله طلع كاميرات الموبايل عشان يصور اللي بيحصل بالظبط ايه.. وكلهم لقطوا صور سحابة دخان كثيفة جاية من ميناء بيروت.. سحابة كبيرة جدًا واصلة للسما فوق.. هتلاقي شكلها في الصور تحت 👇

الناس قعدت تصور وهما مش مدركين اللي على وشك إنه يحصل.. اللي يستغفر الله، واللي يتشاهد، واللي ينده على حبايبه واللي حواليه وهو خايف من المشهد..

وفجأة، وبدون سابق إنذار، مجموعة انفجارات صغيرة تدوي جوه مركز الإنفجار اللي مغطيه الدخان، وقبل ما أي حد يلحق يفتح بقه بكلمة حتى، جه الإنفجار التاني..

إنفجار كارثي، أكبر من أي انفجار شهدته أي دولة عربية تقريبًا.. حتى لبنان اللي كانت متعودة على القصف الإسرائيلي، عمرها في تاريخها ما شافت مشهد زي ده..

الناس اللي بتصور من الشوارع ومن البلكونات ومن المراكب في المية ومن العربيات، فجأة شافوا انفجار عظيم هز لبنان كلها حسب كلام الناس، مش مجرد بيروت.. الأول بدأ بنور كبير وساطع عمى عيونهم لحظة، وبعدين انفجار وصل للسماء، وطلع معاه موجة تصادمية Shockwave كبيرة أشبه بالموجات اللي بتحصل بعد الإنفجارات النووية، ومعاها سحابة كبيرة من الدخان والنار البرتقالية، طلعت للسما على شكل سحابة عيش الغراب اللي بتميز الإنفجارات النووية محدودة المدى!!

شوفوا الكومنتات اللي هحطهالكم تحت، هتلاقوا أكتر من ١٠ فيديوهات من تصوير ناس متفرقة في أماكن مختلفة من بيروت للإنفجار 👇 وكل واحد فيهم مترقم 1 و 2 و 3 وهكذا.. شوفوا كل فيديو لآخره لإنه في الأول هيكون باديء من بعد الإنفجار الأولاني.. وهيلقط الإنفجار الهائل التاني اللي شبه الإنفجار النووي.. وتحذير ليكم لإن المشهد مرعب..

الناس اللي بيصوروا قلبهم اتخلع من المنظر،واللي وقع، أو اللي قعد يصوت ويقول إنفجار نووي، ويتشاهد لثانية ولا اتنين، أو اللي حاول يهرب، كل ده في ثواني قليلة، قبل ما المرحلة التالتة تيجي..

المرحلة التالتة كانت موجة صوتية عظيمة مصاحبة للإنفجار، دمرت الإزاز بتاع البيوت والعربيات والفنادق والمحلات، وكل حاجة تقريبًا فيها إزاز.. غير إنها سببت صمم مؤقت لمئات من الناس اللي سمعوها!!

الصوت والتأثير بتاع الإنفجار حسب مصادر صحفية في صحيفة الجارديان اتكلموا مع ناس من مدينة لارناكا في جزيرة قبرص، وصلهم هناك.. تخيل انت!! 

تأثير الإنفجار وصل لقبرص اللي على بعد ٢٤٣ كيلومتر من بيروت، عبر البحر المتوسط!! وهتلاقي المصدر في سكرين شوت من خبر الجارديان في الكومنتات لو مش مصدق 👇

حسب منظمة الصليب الأحمر اللبناني Lebanese Red Cross، فإن عدد الضحايا يقدر بالمئات، منهم ١٠ تم تأكيد موتهم في الدقايق الأولى، وغيرهم عشرات بيتم محاولة انتشالهم من تحت الأنقاض..

مروان عبود اللي هو محافظ بيروت، وصل لمكان الإنفجار، وبعدين عيط غصب عنه وهو بيتكلم مع الصحافة، وقالهم إن كان في فريق من رجال الإطفاء في منطقة الإنفجار، كانوا بيحاولوا يطفوا الحريق قبل الإنفجار التاني ما يحصل.. وبعد الإنفجار اتقطع الإتصال بيهم، ومحدش لاقيهم خالص، ولا حتى لاقيين أشلاءهم.. كإنهم اتبخروا..

وقال لصحفي لبناني وهو بيعيط وعينه مدمعة إن اللي حصل ده بيفكره باللي حصل في انفجار هيروشيما وناجازاكي في اليابان بسبب القنبلة النووية اللي رمتها عليهم أمريكا في نهاية الحرب العالمية الثانية.. وقال إن اللي حصل ده هو ما شافش زيه قبل كده سواء في القوة أو في الحجم ودائرة التأثير.. وعيط أكتر وهو بيقول إن دي كارثة قومية لبلد لبنان كلها، وللشعب اللبناني.. وإنهم مش عارفين هيعدوا منها ازاي في وسط الاقتصاد بتاعهم المنهار بالفعل..

وزير الداخلية اللبناني قال للصحافة بعدها إن غالبًا سبب الإنفجار هو كمية كبيرة من نترات الأمونيوم ammonium nitrate كان بيتم تخزينها في الميناء، وانفجرت..

الناس بعد الإنفجار كانت بتحاول تجري قي الشارع، عشان الأنقاض مفيش عربيات تقدر تعدي منها.. بيحاولوا يروحوا المستشفى القريبة عشان يتعالجوا، بس المستشفى رفضت استقبال معظم الحالات لإنها اتدمرت بتأثير الإنفجار بردو، ومبقاش عندها معدات طبية للإسعاف، ولا حتى غرف عناية مركزة..

عايز أقولك كمان إن الإنفجار دمر جزء من مطار بيروت وسبب خسائر فادحة فيه.. المطار اللي على بعد أكتر من ١٠ كيلو من مركز الإنفجار.. تخيل انت قوة إنفجار يدمر أجزاء من مطار على بعد ١٠ كيلو.. وهتلاقي صورة المطار بعد الإنفجار في الكومنتات 👇

منظمة الصليب الأحمر في لبنان قالت انهم بيجيلهم اتصالات مش قادرين يردوا عليها كلها، وطلبوا من كل اللي يقدر يروح يتبرع بالدم في بيروت..

طبعًا إسرائيل طلعت نفت رسميًا علاقتها بالحادث، رغم إن لسه قبلها بنيامين ناتنياهو رئيس الوزراء الإسرائيلي كان بيتعهد حزب الله بالرد على اللي هما عملوه ف إسرائيل من أسبوع، وقالهم نصًا إنهم ياخدوا العبرة من رد الجيش الإسرائيلي على التطورات العسكرية الأخيرة على الحدود بين لبنان وإسرائيل.. شوف كلامه هنا:

https://bit.ly/2Xu8kwv

بس في ناس من بيروت قالوا انهم شافوا طيارة سودا معدية من فوق الميناء قبل الإنفجار بثواني.. ولقطوها صورة جوه فيديو.. هتلاقيها تحت في الكومنتات ومتعلم جوه الصورة على شكل الطيارة 👇 (بس طبعًا دي تكهنات مالهاش مصدر مؤكد لسه)

هل فعلًا بقى إسرائيل مالهاش يد في الموضوع؟!.. الله أعلم..

طب هل الموضوع ده له علاقة بالتظاهرات اللي كانت بتحصل في لبنان قدام وزارة الطاقة من المواطنين اللي بيطالبوا بمسائلة الحكومة في المجاعة والإنهيار الاقتصادي للي البلد واصلاله؟!

الله أعلم..

بس المشهد مخيف لدرجة الرعب، ومحزن لدرجة القهر..

لبنان الجميلة، اللي كانت قطعة من أوروبا.. بناسها الحلوين ومناظرها الطبيعية الخلابة وشوارعها النضيفة، بقت أشبه بساحة حرب بعد انفجار نووي.. العربيات مقلوبة في الشوارع ومحروقة، والمباني اتحولت لأنقاض وازازها كله اتكسر وبقى مغلف الأسفلت زي السجاجيد.. الناس من قوة الانفجار تايهين ومش عارفين يروحوا فين يستقبلهم ويداوي جراحهم..

لبنان على شفا السقوط، وده شيء ممكن يقتل الواحد حزنًا على البلد الشقيق الجميل ده..

قلوبنا معكم يا لبنانيين.. ربنا يصبركم ويخرجكم من الكارثة دي على خير.. ويحاسب المتسبب فيها بقدرته..

وربنا يرحم الضحايا برحمته التي وسعت كل شيء.

شوف الكومنتات ضروري هتلاقي فيها فيديوهات كتير للانفجار من كل ناحية، بس خلي بالك هي مخيفة فعلًا وهترعبك لإنها أشبه بانفجار نووي محدود بيحصل قدامك ف الحقيقة وعلى الشاشة.. شوفهم وإحمد ربك إنك مش مكان اللي بيصوروا دول 👇

وهتلاقي كمان صورة من Google Earth بالقمر الصناعي بتوضح موقع الإنفجار تحت في الكومنتات 👇

ودي مصادر للأخبار العالمية اللي بتغطي الكارثة القومية دي، من معظم الصحف العالمية لو حابب تقرا عنها بتفاصيل أكتر:

https://www.bbc.com/news/world-middle-east-53656220

https://www.theguardian.com/world/live/2020/aug/04/beirut-explosion-huge-blast-port-lebanon-capital

https://www.nytimes.com/2020/08/04/world/middleeast/beirut-explosion-blast.html

إدعوا لاخواتكم الضحايا بالرحمة، ولبلدكم التاني لبنان بالتوفيق.. ربنا يرزقهم القوة والحكمة إنهم يخرجوا من الكارثة دي على خير.

حكومات متعاقبة لم يمتلك مسؤولوها الشجاعة الكافية للإشارة على أصل المشكلة التي تعاني منها بلاد بجمال و غنى لبنان مخافة مواجهة نفس مصير الشهيد "رفيق الحريري"،حتى نجله تقهقر و قدم تنازلات كثيرة من أجل البقاء على كرسيه أهمها مهزلة اتفاق 7 أيار الذي رسخ الفرقة الطائفية و أعطى الدولة على طبق من دهب لمليشيات حزب  الله لتسيطر على مفاصل الدولة سياسيا و اقتصاديا و طائفيا مكونة بذلك دويلة داخل دولة تابعة قلبا و قالبا للمحور الإيراني.

و شعب تربى أغلبه على تقاليد البذخ و الثراء بمقابل الكسل و اللامبالات،منسلخ عن محيطه،منفصل عن واقعه يدخن النرجيلة و يرقص و يطبل و يزمر و يحتسي أجود أنواع الخمور و يتردد على المنتجعات الخاصة في الوقت الذي كانت فيها البلاد تمر بأسوء أزماتها.

لبنان مثال الدولة الفاشلة بامتياز التي أصابتها لعنة الجغرافيا و التاريخ،دولة تعاني من أمراض مستفحلة تم على مدار عقود من الزمن التخفيف من وطئتها بحقن مسكنات الألم،إلا أن الكل كان يعلم أن الموت السريري قادم لا محالة في غياب إرادة شعبية قبل حكومية لمعالجتها.

السؤال الٱن هو كيف ستكون تداعيات انفجار اليوم على الأجواء السياسية و الإقتصادية و الإجتماعية للبلاد!!؟هل سنرى حربا أهلية أخرى!؟أم اتفاقا سياسيا ٱخر!؟؟

هل سيدرك المجتمع الدولي أخيرا أن رأس الأفعى موجود في "طهران"و يتردد على "الدوحة" من ٱن لٱخر!؟أم سيترك لبنان فريسة للمجاعة و الإفلاس و الحرب الأهلية و الثورة الشعبية الهادرة لينتهي من صداع الرأس الذي يسببه!؟